Гласот В се артикулира слично на гласот Ф. При неговиот изговор учествува долоната усна и горните секачи, а гласниците треперат. Овој глас е звучен. Воздушната струја кај овој глас во однос на гласот Ф е послаба и гласот В според траењето е краткотраен. И при артикулацијата на овој глас мекото непце е подигнато.

Гласот „В“ може да не се артикулира кога постои дефект на долната усна и горните секачи. Недостатоци од функционален карактер се : неизговарање на гласот „В“ или негова замена со гласот „М“ кога детето силно ќе ја стисне долната усна со горните секачи и ќе го спречи формирањето на тесниот премин за воздух помеѓу усните и забите (воздушната струја тогаш поминува низ носот и тогаш доаѓа до назален изговор или замена со гласот „М“). Друг функционален недостаток е кога гласот „В“ се заменува со гласот „Ф“ (поради не треперење на гласниците) односно поради недоволна аудитивна дискриминација на овие два гласа кај наглувите деца или кај децата со недоволно развиен фонематски слух.

Формирањето на гласот В се изведува на два начина:

1. На детето му се покажува положбата на говорните органи и веднаш се изговара гласот.
2. Се почнува од изговорот на гласот „Ф“ тивко, логопедот и детето наизменично го изговараат и во еден момент логопедот започнува да го изговара гласот „В“, а детето слушајќи ќе го забележи новиот глас и според примерот на логопедот спонтано ќе продолжи да го изговара.